Вход в личный кабинет

😍😍😍🚩🥁🎺Мэйик оскуолатыгар икки күн устата Пионерия 100 сылын көрсө сүрдээх үчүгэй тэрээhиннэр буоллулар.

Ол курдук, оскуола иhинэн үлэлиир оҕолор “Эрэл” түмсүүлэрэ ветеран пионердартан интервью ыллылар. Өр сыл КДУну салайан кэлбит, Саха республикатын культуратын үтүөлээх үлэһитэ Джемма Иннокентьевна Федотова, олохтоох библиотека библиотекара Галина Абрамовна Иванова, нэhилиэк ветерана, элбэх оҕо ийэтэ Борисова Раиса Борисовна, оскуола учууталлара Борисова Маргарита Егоровна, Федоров Владимир Афанасьевич, Саввинов Николай Анисимович үөрэ-көтө оҕо саастарын санаан, элбэххэ угуйбут, элбэххэ эбээhинэстээбит кыыһар кыhыл хаалтыстаах кэмнэрин ахтан-санаан, оҕолорго ахтыыларын биэрдилэр.

Онтон эбиэт кэнниттэн тимуровскай хамаандалар нэhилиэк олохтоохторугар, үлэ ветераннарыгар көмөлөҺөн, мас саhааннаан, эмиэ сүрдээҕин астынан, үөрэн-көтөн дьиэлэригэр тарҕастылар.

Олохтоохтор оҕолорго махтал тылларын этэн, билиҥҥи ватсап үйэтигэр мобильнай ситимнэр нөҥүө ыыталаатылар.

Классоводтар барахсаттар оҕолорун салайан, оҕолорго көх-нэмэ буолан сылдьыстылар.

Бэҕэһээ, ыам ыйын 18 күнүгэр, оскуола үөрэнээччилэрэ, үлэһиттэрэ бары сарсыардаттан кыhыл хаалтыс баанан, хайдах эрэ бу күнтэн туох эрэ уратыны күүтэрдии кэллилэр. Уруоктар кэннилэриттэн Пионерия 100 сылыгар аналлаах торжественнай сбор саҕаланна. Сылын аайы ыам ыйын 19 күнүгэр Буор ураһаҕа ыытыллар пионерскай сбор быйыл оскуолаҕа ыытылынна. Онон, арыый да өссө ордук тэрээһиннээх буолла.

Биhиги кэминээҕи оҕолор бары да дьоллоох кэмнэрбитин хаhан да умнубаппыт, баччааҥҥа диэри “Мэлдьи бэлэммит” диэн өрүү инники сылдьабыт. Сааhыран эрэр көлүөнэ дьоно сүрдээх элэккэй, аһаҕас, кимиэхэ бары бастакынан көмөҕө барар, оҕо эрдэҕинээҕи патриотическай иитиибитин баччааҥҥа диэри тута сылдьар көлүөнэ буолабыт.

Онон, ыччаттарбытыгар этэрбит, кэпсиирбит сүрдээх элбэх, өрүү кинилэргэ холобур көрдөрөбүт.
Ол да курдук, ветеран пионердар бу сарсыарда ох курдук оҥостон, Пионерия 100 сылыгар анаммыт торжественнай сборга кэлэн, оскуола оҕолорун иннилэригэр речевкалаах, ырыалаах хааман киирэн хоhоон аахтылар, өрүү инникигэ сирдиир девизтэри эттилэр. Оҕо саастарын кэрэ кэмнэрин аҕыйах мүнүүтэ эргиппиккэ дылы санаатылар. Бэйэлэрэ да бүгүҥҥү күнтэн астынан, өрө көтөҕүллэн дьиэлээбиттэрэ чуолкай.

Биhиги пионердар хаhан да кырдьыбаппыт, өрүү эдэрбит, баҕар баттахпыт кыратык кырыардын, уҥуохпут кыратык төҥкөйдүн, атахпыт уйарын тухары араас тэрээhиннэргэ өрүү инникибит. Биhиги пионердар мэлдьи бэлэммит.

Мэйиктэн Валентина Попова.

Вход

Введите логин и пароль, указанные при регистрации