Перейти к содержимому
Youtube
Instagram
Вход в личный кабинет
Меикская сельская библиотека – филиал №16
Читателям
Үөһээ Бүлүү төрөөбүт күнүгэр аналлаах нэһилиэктэринэн тургутук боппуруоһа
День защитника Отечества
А.Е. Ильина 80 сыллаах юбилейыгар аналлаах тэрээhин
“Данилов дьыктаана”
Библиотечные уроки
Главная
Коллегам
Контакты
Проекты
Партнеры
История библиотеки
Документы
Обеспечение равных возможностей
Услуги
Клубы
Часы работы
Как записаться
Вопрос—ответ
Памятные места
История села Меик
Өбүгэм омоон суолунан
Новости
Книжная выставка
О библиотеке
Ийэ баар бу сиргэ Аан дойду аанньала
Ресурсы
Events
Menu
Читателям
Үөһээ Бүлүү төрөөбүт күнүгэр аналлаах нэһилиэктэринэн тургутук боппуруоһа
День защитника Отечества
А.Е. Ильина 80 сыллаах юбилейыгар аналлаах тэрээhин
“Данилов дьыктаана”
Библиотечные уроки
Главная
Коллегам
Контакты
Проекты
Партнеры
История библиотеки
Документы
Обеспечение равных возможностей
Услуги
Клубы
Часы работы
Как записаться
Вопрос—ответ
Памятные места
История села Меик
Өбүгэм омоон суолунан
Новости
Книжная выставка
О библиотеке
Ийэ баар бу сиргэ Аан дойду аанньала
Ресурсы
Events
“Василий Титов – олох тыйыс тыыннаах кырдьыга”.
29 марта, 2022
📚📚📚Кулун тутар 24 күнүгэр, Мэйик нэhилиэгэр истиҥ-иhирэх көрсүһүү буолан ааста. Чурапчы улууhугар күтүөттээн олорор, Үөһээ Бүлүү Балаҕаннааҕыттан төрүттээх, биир дойдулаахпыт, Чурапчы улууhун “Саҥа олох” хаhыат кэрэспэндьиэнэ, Арассыыйа суруналыыстарын сойууhун чилиэнэ, улуус бойобуой дьайыы бэтэрээннэрин сэбиэтин бэрэссэдээтэлин солбуйааччыта Семен Александрович Жендринскэй саҥа таhаарбыт, буруолуу сылдьар “Василий Титов – олох тыйыс тыыннаах кырдьыга” кинигэтин сүрэхтэниитэ сүрдээх иhирэхтик, наhаа истиҥник буолан ааста.
⠀Кинигэ сүрэхтэниитигэр улуус мунньаҕын депутаттарын сэкэрэтээрэ Мария Александровна Жендринская, Василий Николаевич племяннига, өр сылга Үөһээ Бүлүү улууhун биир бастыҥ үлэлээх уhуйаанын салайбыт Василий Титов эдьиийэ, Зинаида Николаевна уола, Хоро орто оскуолатын учуутала Николай Семенович Николаев, Мэйик нэhилиэгин биир киэҥ туттар ыаллара Анна Николаевна, Николай Илларионович Николаевтар оҕолоро, сиэннэрэ кэлэн кыттыыны ылан бардылар.
⠀Сүрэхтэнии Василий Николаевич Титовка кулууп иннигэр туруоруллубут бронза бүүhүгэр сибэкки уурууттан саҕаланна.
⠀”Кууhа түһэр кустуктар”- новелланы Сургуулук сынньалаҥ киинин видео- клибын кулуупка киирэн көрдүбүт. Сүрдээх үчүгэйдик, киhи сүрэҕин ортотунан киирэр гына туруоруллубут новелла дьон болҕомтотун тардыан тарта.
Мустубут дьон Василий Николаевич олоҕун бииртэн биир харахтарыгар көрөргө дылы буоллулар. Сып-сылааhынан сырылаччы тыгар күннээх, күөх да күөх халлааннаах, күөх чээлэй Хомустаах, уолбат уйгулаах Уйалаах, уҥуоргута көстүбэт Угдаhар, Улуу улахан Мунду күөл, cайдам-мүөттэй салгыннаах Сайылык эбэлэрбит – бу барыта Баhылай оҕо сааhа ааспыт, оҕус сиэппит, бурдук быспыт, хортуоппуй, турунуопус хостообут алаастара.
⠀Августина Иванова “Дойдум дьоно” ырыатынан кэлбит дьону эҕэрдэлээтэ.
Оскуолаҕа үөрэнэр сылларыгар, сааскы каникул кэмигэр, оройуон киинигэр күрэхтэһэ, куоталаһа түмсэллэрэ. Ырыаҕа-тойукка, спортка, уус-уран ааҕыыларга инники күөҥҥэ сылдьаллара. Маннык түмсүүлэргэ сүрдээх, киhи дууhатын таарыйар гына, хоhоону ааҕар Саха республикатын үөрэҕириитин туйгуна, методист учуутал бэлиэ хаhаайката, Мэйик оскуолатын оҕолорун улуу нуучча тылыгар үөрэппит, билигин сынньалаҥҥа олорор, Зоя Васильевна Бускарова Титовка аналлаах хоhоону ааҕан, дьон сүрэҕин долгутта.
⠀Оскуола национальнай култуураҕа учуутала, Саха республикатын үөрэҕириитин туйгуна, РФ суруналыыстарын чилиэнэ, Мэйик нэhилиэгин бочуоттаах олохтооҕо, муниципальнай тэриллии депутата, Владимир Афанасьевич Федоров Василий Николаевич олорбут алааhын, бииргэ үөрэммит кыыhын аҕалан тапталын билиммит, айылҕаҕа сэдэхтик көстөр модьу-таҕа, лаглаҕар хатыҥын туhунан кэпсээн, дьон интэриэhин өссө күүһүртэ.
⠀Бу дойдуттан букатыннаахтык барыан иннигэр Николай Гаврилович Золотореву – Николай Якутскайы арыаллаан Мэйигинэн, Далырынан сылдьан ааспытын ахтан-санаан аастыбыт. Сүрдээх ардахтаах, сөрүүн күhүн кэлэн ааспыта. Тыбыс-тымныы оскуолаҕа саха республикатын үтүөлээх учуутала Валентина Николаевна Иванова саха бөдөҥ суруйааччытын нуучча тылын кабинетыгар оҕолору мунньан, сүрдээх, эмиэ ис- иhиттэн тахсар сылаас көрсүһүүнү тэрийбитэ. Николай Якутскайга оҕолор кини айымньытыгар бэйэлэрин уруhуйдарын, оҥоhуктарын биэрбиттэрин ылан сүрдээҕин үөрбүтэ, долгуйбута.
⠀Мин улахан уолум Алёшка 9-с кылааска үөрэнэр сыла этэ. Кини ити иннинээҕи күн кустаабыт куhун, быраата, кыра уолбут Бочуок начальнай кылаас, Николай Якутскай “Маҥнайгы сааланыы” кэпсээнигэр сценка туруора охсон толорторбуппут, онтон сибээстээн Николай Якутскайга кустарын туттарбыта – эмиэ биир дьикти, соhуччу көстүү буолбута.
⠀Бу Василий Николаевич дойдутугар бүтэһик кэлиитэ этэ. Чахчы дойдутун таптыырын, ахтарын эдьиийэ Анна Николаевна сөҕөн кэпсээччи. Хаhан да кэллин, бастакынан олорбут алаастарыгар, өтөҕөр, этиҥнээх ардах да ортотугар сатыы баран кэлэр идэлээх эбит.
⠀Баhылай бэрт элбэх үчүгэй хаачыстыбалааҕа. Ол курдук, чугас дьонугар, аймахтарыгар, табаарыстарыгар олус амараҕа, аhыныгас майгылааҕа, мэлдьи көмөлөһө, санааларын өрө көтөҕө сылдьара.
Ону кини сүрдээх үчүгэйдик ийэтигэр, кэргэнигэр анаабыт хоhоонноро туоhулууллар. Кэргэнигэр анаабыт хоhоонун маҥнайгы кылаас үөрэнээччилэрэ быhа тардан аахтылар.
⠀”Бэйэ анала киhини киэргэтэр. Киhи дууhата күөх торҕо өҥүнэн симэммит араас отунан-маhынан барҕа баай тыа”- курдук диирэ Василий Николаевич.
⠀Маҥнайгы кылаас эбээлэрэ Василий Николаевич хоhоонноруттан быhа тардан ааҕан, сиэннэрин толорууларын ситэрэн биэрдилэр.
⠀
⠀⠀Экология комитетыгар үлэлии сылдьан, төрөөбүт Бүлүүтүн айылҕата, дьонун сэргэтин доруобуйата улаханнык айгыраабытын көрөн, олус сөҕөрө, хараастара, санаата түһэрэ. Араас учуонайдар суруйууларын элбэхтик ааҕара, үөрэтэрэ.
Сахабыт сирин эгэлгэ кэрэтин, эҥин бэйэлээх баайын-дуолун баhылааччыларын кытта көрсөрө, кинилэр айымньылаах үлэлэрин, олохторун суруйан, дьон киэҥ билиитигэр таhаарбыта.
⠀Мустубут дьону “Сахам сирэ” ырыатынан Мэйиктээҕи уhуйаан старшай баспытаатала Алена Федотова эҕэрдэлээтэ.
Ис хоhооннорунан, проблемаларынан, сэhэргиир ньымаларынан, тылы- имитэн -хомутан туhанарынан, тылы дириҥник өйдүүрүнэн, сиппит-хоппут маастар суруйбут этэ диэн”- профессор Виктор Михайлов бэлиэтээбитэ элбэҕи этэр.
⠀Кинигэ сүрэхтэниитигэр кэлбит дьон бары 90-с сылларга сураҕа-садьыга суох сүтэн хаалбыт, Мэйикпит биир баар суох киэн туттар, тахсан эрэр дьоhуннаах суруйааччыбыт, Василий Николаевич Титовы кэриэстээн кэлэн, тыыммакка да Семен Александрович Жендринскэй ахтыыларын, саха биллиилээх суруйааччыларын көрсөн, элбэх киhини кытта алтыһан ахтыылары ЯГУга студенныы сылдьан, сүрдээҕин толло-толло хомуйбутун, улахан суруйааччылары кытта алтыспытын, туох да киэргэтиитэ суох, боростуойдук кэпсээбитин сэҥээрэн иhиттилэр. Кырдьык да тыла-өһө лоп – бааччыта, киhини бэйэтигэр тардар күүстээх энергетикалааҕа биhини сөхтөрдө. Бииртэн биир санаатын туох баарынан дьону кытта төгүрүк остуол тула олорон, уруккуттан биhигинниин билсэрдии кэпсэппитэ көрсүһүүнү тупсарда. Көрсүһүүгэ Семен Александрович Саха республикатын үтүөлээх үлэhитэ Василий Васильевич Ченохов “Үс Бүлүү албан ааттаахтара” 5 киhиэхэ кинигэтин ыыппытын туттарбыта.
⠀Василий Николаевич Титов барахсан төһөлөөх элбэх айымньыны суруйуон, айыан-тутуон хаалбытын хантан билиэҥ баарай? Саамай айар-тутар сааhыгар бу орто дойдуттан туох да суола-ииhэ суох сүтэн хаалбыта, биир дойдулаахтарын сүрдээҕин хомотор, хоргутуннарар. Аймахтара барахсаттар баччааҥҥа диэри “син биир хаhан эрэ ааны сэниэлээхтик аhан киирэн кэлиэ ” диэн сэмэйдик кэтэhэллэрэ чуолкай.
⠀Семен Александрович Василий Титов дьиэтигэр сылдьан, кэргэнэ Ирина Иннокентьевнаны кытта көрсүбүтүн, Василий Николаевич киэҥ эйгэҕэ таhаарбакка хаалбыт рукопистарын көрдөрбүтүн, чэй иhэ-иhэ кэпсэппиттэрин кэпсээтэ. Билигин да дьон билиитигэр таhаарбатах суруга-бичигэ онно баарын, ким эмит ол суруктары үөрэтиэн, киэҥ эйгэ5э таhаарыан баҕарарын Мэйик дьонун кытта санаатын үллэһиннэ.
⠀Семен Александровиһы Василий Николаевиhы төһө билэрбитин, кылгастык да буоллар алтыһан хаалбыппытынан киэн туттабыт, астынабыт. Семен Александрович таhаарбыт “Василий Титов- олох тыйыс тыыннаах кырдьыга” кинигэтин ааҕыах, үчүгэйдик билсиэх буолан хааллыбыт. Бу кинигэ чараас да буоллар сүрдээх дириҥ ис хоhоонноох, дьоhуннаах кинигэ, аҕыйахта арыйаат элбэҕи өйдүүгүн.
⠀Биhиги улууспут ыччата, атын улууска олорон, маннык кинигэни таhаарбытын сөхтүбүт. Нэhилиэк дьонун-сэргэтин аатыттан Семен Александровичтыын Бүлүү пед колледжыгар бииргэ үөрэммит, билигин баhылык эбээhинэhин толоро сылдьар Андрей Владимирович Тимофеев махталын тиэртэ уонна саха ыалдьытымсах ыалыныы Яна Саввична Санникова салайар “Сайдыына” түмсүүтүн аатыттан сэмэй бэлэҕин туттарда. Биhиги нэhилиэк сүрдээх ыалдьытымсах нэhилиэк. Мэйик нэhилиэгин социальнай үлэһитэ Марианна Потапова эмиэ бэлэҕин туттарда. Салгыы КДУ директора Антонина Владимировна, Василий Николаевич Титов аймахтара туттардылар уонна абаҕаларын аатын үйэтитэн, кини үлэлэрин ырытан, ахтыылары хомуйан кинигэ таhаарбытыгар сүрдээх истиҥ тыллары эттилэр.
⠀Биhиги биир дойдулаахпыт, суруйааччы Василий Николаевич Титов аата-суола үйэлэргэ ааттана, биhиэхэ, Мэйиктэр ыччаттарбытыгар, ыйар сулус буолан, хаалларбыт айымньылара ыччаттарбыт олохторун оҥостоллоругар саҥа толкуйдары саҕыа диэн эрэнэбин.
⠀Василий Николаевич ситэри олорботох олоҕун кыыhа, сиэннэрэ, аймахтара салгыахтара, утум салҕанар. Хаhан эрэ сытыы бөрүөлээх, кини курдук кырдьыгы эрэ кэрэхсиир суруйааччы, журналист Титовтартан, Николаевтартан тахсыа диэн эрэнэбин.
⠀Наhаа истиҥ көрсүһүүнү түмүктээн ырыатын бэлэхтээтэ улуустааҕы физико-математическэй лицей бастыҥ үөрэнээччитэ Фаридум Алексеев.
⠀Итинник дойдуларыгар бэриниилээх, дойдуларын дьонун атын улууска да олордоллор ааттата сылдьар эдэр оҕолорбутунан биhиги киэҥ туттабыт уонна кырдьык да “Биhиги Үөһээ Бүлүүлэр” диэхпитин баҕардым.
⠀Семен Александрович, кытаат, дэлби дойдуҥ дьоhун дьонун-сэргэтин суруй, “суруллубут суоруллубат” диэбиттэринии, кинигэлэриҥ үйэлэргэ элбэҕи кэпсии сырыттыннар. Дьиэ кэргэннэр этэҥҥэ буолууну, бэйэҕэр ситиhиилэри, санаабытын сатанан истин, толкуйдаабытын тобулла турдун диэн алгыы хааллыбыт, дьоллоох буол.
⠀
⠀⠀ Мэйиктэн Валентина Попова.
Вход
Введите логин и пароль, указанные при регистрации
Адрес электронной почты
Пароль
Запомнить меня
Войти
Забыли пароль?
|
Register
X